Ultimate magazine theme for WordPress.

ओली विरुद्धको प्रचण्डको प्रस्ताव वादलद्वारा अस्विकार, वादल ओलीतिर

51

काठमाडौं : नेकपाको संस्थापन पक्ष विरुद्धमा संसदमा अविश्वासको मत लिएर जाने तयारीलाई गृहमन्त्री रामबहादुर थापा बादलले अस्वीकार गरेका छन्। आइतवार कार्यकारी अध्यक्ष पुष्पकमल दाहाल प्रचण्ड निवास खुमलटारमा भएको एउटा बैठकमा गृहमन्त्रीसमेत रहेका बादलले पार्टी विभाजनका लागि गरिने कुनै पनि प्रयासमा आफ्नो असहमति रहने धारणा राखेका हुन्।

कार्यकारी अध्यक्ष दाहालले फोन गरेर बोलाएपछि बादल आइतवार दिउँसो प्रचण्ड निवास खुमलटार पुगेका थिए। उनी प्रचण्ड निवास पुग्दा पहिले नै नेकपाका वरिष्ठ नेताहरु माधवकुमार नेपाल र झलनाथ खनाल तथा प्रवक्ता नारायणकाजी श्रेष्ठ बसिरहेका थिए। प्रचण्डले केही कामका लागि भनेर बोलाएपछि त्यहाँ पुगेका उनी अन्य नेताहरुलाई पनि देखेपछि अलमलमा परेका थिए।

बादल खुमलटार पुगेपछि उनीसँग दुई नेताले संवाद गरेको स्रोतले जनाएको छ। स्रोतका अनुसार बादलसँग अध्यक्ष दाहाल र प्रवक्ता श्रेष्ठले संवाद गरेका थिए। श्रोतका अनुसार अध्यक्ष दाहालले ओलीले एकलौटी गरेको भन्दै सुरुमै बादलसँग सहयोग मागेका थिए।

‘अब केपीजीसँग नसकिने भइयो, हामीलाई तपाईंको पनि सहयोग चाहियो’, प्रचण्डले बादलसँग गरेको सम्वाद उद्धृत गर्दै श्रोतले भन्यो, ‘यसरी अब सधैँ चल्न सकिँदैन, त्यसैले तपाईंले हामीलाई साथ दिएर ओलीजीलाई बिदा गर्ने वातावरण बनाउनुपर्‍यो।’

प्रचण्डले त्यस क्रममा पार्टीका २५ प्रतिशत सांसदको हस्ताक्षर हुने बताउँदै त्यसमा बादलले पनि हस्ताक्षर गर्नुपर्ने मत राखेका थिए। बादलले प्रचण्डको कुरा सुनिसकेपछि पार्टीमा समस्या भए सचिवालय, स्थायी कमिटी र केन्द्रीय कमिटी बैठक डाक्न भनेका थिए।

‘प्रचण्डले सहयोग चाहियो भनेपछि उहाँले स्थायी कमिटी वा सचिवालयमा जानुपर्छ भन्‍ने राय राख्‍नु भयो’, उनीनिकट श्रोत भन्छ, ‘यसरी विवाद र झगडा झिकेर अघि बढ्न समस्या हुन्छ, जे समस्या छन्, तिनलाई पार्टी बैठकमा राखेर अघि बढौं।’

प्रचण्डको कुरामा सहमति जनाउँदै नेकपा प्रवक्ता नारायणकाजी श्रेष्ठले पनि अब यसरी नै जान नसकिने भएकाले सहयोग गर्न बादलसँग आग्रह गरेका थिए।

तर बादलले दुवै नेताहरुलाई जवाफ दिँदै यो समस्या पार्टी बैठक बाहिरबाट समाधान हुन नसक्ने राय राखेका थिए। ‘के कारणले यो कुरा आयो? यसको समाधान पार्टी बैठकबाट गरिनुपर्छ’, थापाले जवाफमा भनेका थिए, ‘शनिबार तपाईं (प्रचण्ड) र प्रधानमन्त्री ओलीले सचिवालय बैठक बोलाउन सहमति गर्नु भएको थियो। फेरि एकै दिनमा कसरी यस्तो गम्भीर कुरा आयो?’

राजदूतमा प्रचण्डको सहमति

सोही क्रममा प्रचण्डले बालुवाटारमा गएर ओलीसँग सहमति गर्ने तर बाहिर निस्किएपछि असहमति जनाउने गरेको भन्दै बादलले गुनासो पोखेको बताइएको छ।

‘राजदूत नियुक्तिको जुन कुरा छ, डा. युवराज खतिवडाको प्रस्ताव तपाईं आफैंले गरेको हो। प्रधानमन्त्रीले मुख्य सचिव पठाऊँ भन्दा पनि ठीकै छ भनेर समर्थन जनाउनु भयो’, बादलले प्रचण्डसँग भने, ‘तर परराष्ट्र मन्त्री प्रदीप ज्ञवालीले जातीय सन्तुलन मिलाउन दक्षिण अफ्रिकाको राजदूतका लागि डा निर्मल कुमार विश्वकर्माको नाम सिफारिस भएको हो। राजदूत नियुक्तिमा कुनै किसिमको असहमति र असन्तुष्टि भन्‍ने थिएन। तपाईंले नै सहमति जनाएर निर्णय भएको हो।’

बादलले पार्टीलाई विभाजनको दिशातर्फ लाने कुरामा आफ्नो असहमति राख्दै त्यसबारे कुरा गर्नु अनुचित हुने सुनाएका थिए। उनले अन्तिममा स्थायी कमिटी र सचिवालयको बैठक बोलाउने पुरानै अडान राखेर बाहिरिएका थिए।

दिल्ली यात्रा

यसैबीच दाहालका छोरीहरु रेणु दाहाल र गंगा दाहाल काकडभिट्टा नाका हुँदै बागडुगराबाट दिल्ली पुगेर आएको खबर बालुवाटारसम्म पुगेको छ। सुरक्षा स्रोतले उक्त सूचना बालुवाटारमा पुर्‍याएको खुलेको छ।

नेकपा संस्थापन पक्षविरुद्ध कांग्रेससँग मिलेर अविश्‍वास प्रस्तावको तयारी भइरहेका प्रचण्ड पुत्रीद्वयको दिल्ली भ्रमणलाई लिएर बालुवाटारले प्रचण्डलाई अझै संशयपूर्ण ढंगले हेर्न थालेको छ।

प्रचण्ड पुत्रीद्वय दिल्ली पुगेर दशैँको टीकाको भोलिपल्ट आएको सूचना बालुवाटारसम्म पुगेपछि त्यही अनुसारको रणनीति बनाउन थालिएको हो। खुमलटारले उनीहरुलाई राजनीतिक भेटघाटका लागि पठाएको बालुवाटारको अनुमान बालुवाटारको छ।

कात्तिक ५ गते काठमाडौं आएका भारतीय गुप्तचर संस्था रअका प्रमुख सामन्त गोयललाई प्रधानमन्त्री ओलीले बालुवाटारमा भेटेको भन्दै चर्को आलोचना भइरहेका बेला प्रचण्ड पुत्रीहरुको दिल्ली भ्रमणलाई अनेक राजनीतिक कोणबाट हेर्न थालिएको छ।

Comments
Loading...